संत कबीरनगर : समाजवादी पक्ष आणि बहुजन समाज पक्षामध्ये झालेल्या आघाडीने यूपीत भारतीय जनता पक्षाच्या अडचणी वाढवल्या आहेत. तर दुसरीकडे लोकसभा निवडणुकीपूर्वी भारतीय जनता पक्षातील अंतर्गत वादही उफाळून आला आहे. संत कबीरनगर मतदारसंघामध्ये आज एका कार्यक्रमादरम्यान भाजपा खासदार शरद त्रिपाठी आणि स्थानिक आमदार राकेश सिंह यांच्यात तुफान हाणामारी झाली. या प्रकाराच्या व्हिडीओ सध्या समाज माध्यमांवर मोठ्या प्रमाणावर व्हायरल होत आहे.

लोकसभा निवडणुकीचा कार्यक्रम काही दिवसांतच जाहीर होण्याची शक्यता आहे. त्यामुळे सध्या युपीमध्ये सत्ताधारी असलेल्या भारतीय जनता पक्षाकडून विविध ठिकाणी उदघाटन आणि भूमिपूजनाचे सोहळे आयोजीत करण्यात येत आहे. तसाच कार्यक्रम संत कबीरनगर येथे आयोजित करण्यात आला होता. या कार्यक्रमाला खासदार शरद त्रिपाठी आणि मेहदावल विधानसभा मतदारसंघाचे आमदार राकेश सिंह यांच्यासह भाजपाचे इतर नेते उपस्थित होते.

यावेळी भूमिपूजनाच्या शिलालेखावर आपले नाव नसल्याने खासदार शरद त्रिपाठी संतप्त झाले. त्यावरून त्यांची राकेश सिंह यांच्याशी बाचाबाची झाली. त्यावेळी शरद त्रिपाठी यांनी चप्पल काढून राकेश सिंह यांना मारहाण करण्यास सुरुवात केली. त्यानंतर आमदार राकेश सिंह यांनीही त्रिपाठी यांना प्रत्युत्तर देत मारहाण केली. अखेर तिथे उपस्थित असलेल्या पोलिसांनी मध्यस्थी करत हे भांडण सोडवले व दोन्ही नेत्यांना एकमेकांपासून दूर नेले.

Social media users are trolling bjp party mp sharad tripathi and mla rakesh singh exchange blows over names on a foundation stone of a project