आनंदाची बातमी! जगात कोरोनातून बऱ्या होणाऱ्या रुग्णांची संख्या वाढली

नवी दिल्ली, १४ जून: जगात धुमाकूळ घालणाऱ्या कोरोना व्हायरसच्या जगातील एकूण रुग्णांपैकी निम्म्यापेक्षा जास्त रुग्ण बरे झाले असून नव्या रुग्णांच्या तुलनेत बऱ्या होणाऱ्या रुग्णांचे प्रमाण वाढत असल्याचे यावर देखरेख करणार्‍या जागतिक पोर्टल वर्ल्डमीटर या संस्थेने म्हटले आहे.

जगातील विविध देशांमध्ये शनिवारी सायंकाळपर्यंत कोरोनाचे एकूण रुग्ण ७८ लाख २ हजार ८६० होते. यातील ४० लाख ३ हजार १३२ रुग्ण बरे झाले आहेत. एकट्या अमेरिकेत २१ लाखापेक्षा जास्त कोरोनाचे रुग्ण असून तेथे कोरोनामुक्त झालेल्यांची संख्या ८ लाख ४० हजारांपेक्षा जास्त आहे. या यादीत दुसऱ्या क्रमांकावर असलेल्या ब्राझील आणि तिसऱ्या क्रमांकावरील रशियातही रुग्ण बरे होण्याचे प्रमाण वाढले असल्याचे या संघटनेने म्हटले आहे.

भारतात कोरोनाचे रुग्ण झपाट्याने वाढत असून शनिवारी सायंकाळपर्यंत भारतात ११ हजार ४५८ नवे रुग्ण सापडले आहेत. भारतात काल दिवसभरात ३८६ रुग्णांचा मृत्यू झाला असून देशातील एकूण कोरोनाग्रस्तांची संख्या ३ लाख ८ हजार ९९३ झाली आहे. भारतातील कोरोना मृतांची संख्या ८,८८४ झाली आहे. दिलासादायक बाब म्हणजे भारतातही बऱ्या होणाऱ्या रुग्णांची संख्या वाढत आहे, असे या संघटनेने म्हटले आहे.

महाराष्ट्रात शनिवारी कोरोनातून बऱ्या झालेल्या १५५० जणांना घरी सोडण्यात आले. आतापर्यंत घरी सोडण्यात आलेल्या रुग्णांची एकूण संख्या ४९ हजार ३४६ झाली आहे. आज कोरोनाच्या ३४२७ नवीन रुग्णांचे निदान झाले असून सध्या राज्यात ५१ हजार ३७९ रुग्णांवर उपचार सुरू आहेत, अशी माहिती आरोग्यमंत्री राजेश टोपे यांनी दिली.

News English Summary: More than half of the world’s coronavirus patients have recovered, and the number of patients recovering from new cases is rising, according to the global portal WorldMeter.

News English Title: More than half of the world  coronavirus patients have recovered according to the global portal WorldMeter News Latest Updates.