मुंबई : महाराष्ट्राच्या तिजोरीत खडखडाट असताना विनायक मेटे यांच्यासाठी शासकीय खर्चातून २० लाखांची कार उपलब्ध करून दिली जाणार आहे. त्यासाठी राज्य शासनाने एक निर्णय जारी केला आहे.
विनायक मेटे हे छत्रपती शिवाजी महाराज स्मारक समितीचे अध्यक्ष असून त्यांच्या विशेष सोयीसाठी आलिशान कार दिली जाणार आहे. विशेष म्हणजे महाराष्ट्र शासनाच्या खर्चाने ही कार उपलब्ध करून दिली जाणार आहे. महाराष्ट्र सार्वजनिक बांधकाम विभागाने तसा निर्णय जारी केला आहे. राज्याच्या तिजोरीत सध्या खडखडाट असल्याने अर्थ खात्याकडून काटकसर करण्यात येत असला तरी सार्वजनिक बांधकाम मंत्री चंद्रकांत पाटील यांनी मात्र विनायक मेटे यांना कार खरेदी करण्यासाठी निधी उपलब्ध करुन देण्यास दबाव आणल्याची राजकीय चर्चा सुरु आहे.
आधीच सर्व घटक पक्ष भाजपवर नाराज आहेत आणि त्यात विनायक मेटे यांनी मराठा आरक्षणाच्या मुद्द्यावरून दिल्लीत परिषद घेणार असल्याचा इशारा दिला होता. त्यामुळेच अडचणीत आणखी वाढ व्हायला नको म्हणून विनायक मेटे यांची कार कि सवारी सोपी झाली.
