मुंबई: सध्या लोकसभा निवडणुकीचे वारे जोरदार वाहू लागले असून शिवसेना राज्याच्या राजधानीत मराठी संस्कृतीपेक्षा उत्तर भारतीय संस्कृतीवर अधिक भर देताना दिसत आहे. याआधी सुद्धा शिवसेनेकडून मुंबई आणि ठाण्यात भव्य उत्तर भारतीय सन्मान मेळावे आयोजित करण्यात आले आहेत. दरम्यान, या कार्यक्रमात अश्लील भोजपुरी कार्यक्रमांचे आयोजनसुद्धा मोठ्या प्रमाणावर करण्यात येत. मुंबई उपनगरात शिवसेनेने उत्तर भारतीय लोकांपुढे पूर्णपणे लोटांगण घातल्याचे चित्र अनेक महिन्यांपासून पाहायला मिळत आहेत.
या भागात मराठी माणसाची डोकी उत्तर भारतीय घोळक्याने फोडली तरी शिवसेनेचे कार्यकर्ते त्याच मराठी माणसाची समाज माध्यमांवर टिंगल टवाळी करताना दिसतात हे राज्याच्या राजधानीतील मराठी माणसाचे दुर्दैव म्हणावे लागेल. शिवसेनेच्या या असल्या कार्यक्रमामुळे मुंबईउपनगरात मराठी संस्कृती भविष्यात हद्दपार होऊन, उत्तर भारतीय संस्कृती इथला ताबा घेईल असेच भविष्यातील चित्र बनत चालले आहे.
शिवसेनेच्या स्थानिक नेत्यांना सुद्धा मराठी पेक्षा इथले उत्तर भारतीय लाडके झाले असून त्यांचं स्थान केवळ भाषणापुरतं मर्यादित राहिलं आहे. इथला मराठी शिवसैनिकांना याचं काहीच सुख दुःख नाही असं एकूण चित्र आहे. बांधकाम क्षेत्राने इथे मोठी भरारी घेतल्याने स्थानिक नेते मंडळी सुद्धा पुनर्वसनाच्या नावाने उत्तर भारतीय नेत्याच्या आणि मतदारांच्या अधीन गेले आहेत. भविष्यात इथले शिवसैनिक आणि मराठी युवक उत्तर भारतीय नेत्यांचे झेंडे खांद्यावर घेऊन मिरवताना दिसले नाही तर आश्चर्य वाटणार नाही असं इथलं एकूण चित्र होताना दिसत आहे.
