सारथी: खासदार संभाजीराजेंचं उपोषण अखेर मागे; सरकारकडून शिंदेंची मध्यस्ती

पुणे : खासदार संभाजीराजे छत्रपती यांनी सारथी संस्था वाचवण्यासाठी सुरु केलेलं लाक्षणिक उपोषण मागे घेतलं आहे. राज्याचे नगरविकास मंत्री एकनाथ शिंदे यांनी उपोषणस्थळी संभाजीराजेंची भेट घेऊन, सारथी संस्थेची स्वायत्तता अबाधित राहील असं आश्वासन दिलं. त्यानंतर संभाजीराजेंनी हे उपोषण मागे घेतलं. “आमच्या सर्व मागन्या मान्य झाल्यामुळे आम्ही हे आंदोलन मागे घेत आहोत”, असे संभाजीराजे म्हणाले आहेत.

माध्यमांशी बोलताना शिंदे म्हणाले की, छत्रपती संभाजी राजेंच्या नेतृत्वात सारथी संदर्भात उपोषण आंदोलन सुरू होतं. सारथी या संस्थेच्याबाबत जी स्वायतत्ता आहे, ती कायम राहिली पाहिजे, जे.पी.गुप्ता या अधिकाऱ्याने सारथी संस्थेत हस्तक्षेप करता कामा नये, संस्थेला कुठेही निधीमध्ये किंबहूना जे काही अधिकार स्वायत्ततेचे आहेत ते कायम राहिले पाहिजे, परिहार यांनी दिलेला राजीनामा स्वीकारला जाऊ नये अशाप्रकारच्या मागण्या करण्यात आल्या होत्या.

छत्रपती शाहू महाराज संशोधन प्रशिक्षण व मानव विकास संस्थेची (सारथी) स्वायत्तता अबाधित ठेवावी, यांसह विविध मागण्यांसाठी खासदार संभाजीराजे छत्रपती यांच्यासह मराठा क्रांती मोर्चाचे पदाधिकारी आणि सारथीच्या विद्यार्थ्यांनी आगरकर रस्त्यावरच ठिय्या देत लाक्षणिक उपोषण सुरू केले होतं. या वेळी सारथीला मोठ्या प्रमाणात निधी द्या, प्रधान सचिव जे. पी. गुप्ता यांच्यावर कारवाई करा, असे फलकही आंदोलकांनी झळकविले होते.

यावेळी शिंदे यांनी मांडलेले मुद्दे पुढीलप्रमाणे :

1. सारथीची स्वायत्तता कायम राहणार
2. व्यवस्थापकीय संचालक डी. आर. परिहार यांचा राजीनामा सरकार स्वीकारणार नाही.
3. सारथीच्या पुढील वाटचालीसाठीच्या निर्णय प्रक्रियेत छत्रपती संभाजीराजे यांना सहभागी करून घेणार.

Web Title:  MP Chhatrapati Sambhaji Maharajs protest cancelled after promise of CM Uddhav Thackeray.