शपथविधी दिवशीच दिल्ली भाजपाची वेबसाईट हॅक, बीफ डिशची पोस्ट

नवी दिल्ली : लोकसभा निवडणुकीत मिळालेल्या बहुमतानंतर मोदींच्या केंद्रीय मंत्रिमंडळाने गुरुवारी सलग दुसऱ्यांदा शपथ घेतली. त्यात एकूण २४ कॅबिनेट मंत्री, ९ स्वतंत्र कारभार सांभाळणारे राज्यमंत्री आणि २४ राज्यमंत्र्यांचा समावेश आहे. दरम्यान एकीकडे राष्ट्रपती भवनात शपथविधीचा शाही कार्यक्रम सुरु असताना दुसऱ्याबाजूला दिल्ली भारतीय जनता पक्षाची वेबसाईट हॅक करण्यात आली होती. यावेळी हॅकर्सनी वेबसाईटच्या होमपेजवर गोमांस म्हणजेच बीफ रेसिपी पोस्ट केली. या रेसिपीसोबत Hacked by ‘Shadow_V1P3R’ असा मेसेजही लिहिण्यात आला होता.

वेबसाईटच्या होमपेजवर एका बीफ डिशचा फोटो पोस्ट करण्यात आला होता ज्याच्याखाली ‘बीफ फ्राय’ असं लिहिण्यात आलं होतं. या फोटोच्या खाली बीफची संपुर्ण रेसिपी पोस्ट करण्यात आली होती. याशिवाय नॅव्हिगेशन बारसोबतदेखील छेडछाड करत भारतीय जनता पक्षाऐवजी बीफ लिहिण्यात आलं होतं. म्हणजे ‘About BJP’ ऐवजी ‘About Beef’ तर ‘BJP History’ ऐवजी “Beef History’ असा बदल करण्यात आला होता. होमपेजवरील इतर कोणत्या गोष्टीत मात्र बदल करण्यात आला नव्हता. असं असलं तरी काही वेळाने वेबसाईट पुर्ववत झाली.