आज मराठा आरक्षणासंदर्भात मुख्यमंत्र्यांसोबत सर्वपक्षीय नेत्यांची बैठक

मुंबई : आज मराठा आरक्षणावर तोडगा काढण्यासाठी मुख्यमंत्र्यांनी महाराष्ट्र विधानसभा आणि विधानपरिषदेच्या सर्वपक्षीय गटनेत्यांची एक बैठक आयोजित केली आहे. या बैठकीत मराठा आरक्षण आणि मराठा आरक्षणावर तोडगा याच मूळ चर्चेचा विषय असणार आहे असं वृत्त आहे.

मुख्यमंत्री देवेंद्र फडणवीस मराठा आरक्षणाच्या मुद्यावर सर्व पक्षाच्या प्रतिनिधींची भूमिका समजून घेतली जाणार आहे. तसेच मराठा वर सर्वबाजुंचा विचार करून काय तोडगा काढला जाऊ शकतो यावर विचारमंथन होणार आहे. वास्तविक मराठा आरक्षणावरून जेव्हा पुन्हा रान उठलं आणि आक्रमक आंदोलनामुळे काकासाहेब शिंदे या तरुणाचा हाकनाक बळी गेल्यावर आंदोलन अजूनच उग्र झालं आहे. त्यानंतर त्याचे पडसाद संपूर्ण राज्यात उमटू लागताच सरकार खडबडून जाग झाल्याचं चित्र आहे.

त्यामुळे या आंदोलन अजून दाहक होण्यापूर्वीच ते थोपविण्यासाठी लवकरात लवकर सर्वपक्षीय नेत्यांची बैठक मुख्यमंत्र्यांनी बोलावली आहे. आज विधान भवनात ही बैठक दुपारी २ वाजता आयोजित होणार असल्याचं वृत्त आहे. राज्य मागासवर्ग आयोगाने मराठा समाजासंबंधीचा अहवाल लवकरात लवकर सादर करावा यासाठीही हालचालींना वेग आला आहे.