भाजपने कोकणात शिवसेनेला धूळ चारली, तर सेनेने मुंबईची जागा पुन्हा राखली

मुंबई : मुंबई पदवीधर मतदारसंघाची जागा राखण्यात शिवसेनेला यश आलं आहे. पण दुसरीकडे कोकण पदवीधर मतदारसंघाच्या निवडणुकीचे निकाल आज सकाळी जाहीर करण्यात आले, त्यात भाजपने शिवसेनेवर मात केली असून शिवसेनेचे उमेदवार संजय मोरे यांना पराभवाची धूळ चारली आहे. त्यामुळे भाजपने कोकणात आयत्यावेळी आखलेले ‘डाव’ खरे ठरले आहेत.

मुंबई पदवीधर मतदारसंघाच्या निवडणुकीत आरोग्यमंत्री दीपक सावंत यांचा पत्ता कट करून विलास पोतनीस यांना संधी देण्यात आली होती. त्यात विलास पोतनीस यांनी भाजपचे उमेदवार अमित मेहता यांचा पराभव केला असून मुंबईची जागा राखण्यात ते यशस्वी ठरले आहेत.

दुसरीकडे मुंबई शिक्षक मतदारसंघाची जागा लोकभारतीचे आमदार कपिल पाटील यांनी तिसऱ्यांदा स्वतःकडे राखली आहे. नाशिक शिक्षक मतदारसंघात शिवसेना पुरस्कृत उमेदवार किशोर दराडे यांचा विजय झाला असून त्यांना मिळालेल्या मतांच्या आकडेवारीवरून तिथे भुजबळांची साथ मिळाल्याची चर्चा रंगली आहे.