फडणवीसांच्या काळातील 33 कोटी वृक्ष लागवड मोहिमेची होणार चौकशी - उपमुख्यमंत्री

मुंबई, ०३ मार्च: अर्थसंकल्पीय अधिवेशनाच्या तिसऱ्या दिवशी सुद्धा विधिमंडळात महाविकास आघाडी विरुद्ध भारतीय जनता पक्ष असा सामना पाहायला मिळाला. तिसऱ्या दिवसाची सुरुवातच काँग्रेस प्रदेशाध्यक्ष नाना पटोले आणि विरोधीपक्ष नेते देवेंद्र फडणवीस यांच्या खडाजंगीने झाली. भारतीय जनता पक्षाच्या सत्तेत असताना तत्कालीन मुख्यमंत्री देवेंद्र फडणवीस यांच्या काळातील वृक्षारोपण मोहिमेवर नाना पटोले यांनी सवाल उपस्थित केले. तसेच चौकशीची मागणी सुद्धा केली. त्यावर वाद होत असतानाच सभागृहात उपमुख्यमंत्री अजित पवार यांनी त्याची चौकशी होणार असल्याचे सांगत फडणवीसांना दणका दिला.

देवेंद्र फडणवीस यांच्या नेतृत्वात भारतीय जनता पक्षाची सत्ता असताना ३३ कोटी वृक्ष लागवडीची मोहिम राबवण्यात आली होती. २०१६ ते २०१७ आणि २०१९-२० या कालावधीत वन विभागाने वृक्ष लागवड योजनेत २८.२७ कोटी वृक्ष लावले. त्यानंतर ऑक्टोबर २०२० च्या शेवटी त्यापैकी ७५.६३% रोपटे म्हणजे २१ कोटी रोपटे जिवंत आहेत. त्याची अजुनही देखभाल करण्यात येत आहे. २०१७ ते २०१९ कालावधीत वन विभागाने व्यक्ती, संस्था, सरकारी संस्था, संघटना आणि उद्योग समूहांच्या माध्यमातून ५० कोटी वृक्ष लावण्याची मोहीम राबवली. यासाठी २०१६-२०१७ पासून २०१९-२०२० पर्यंत २ हजार ४२९ कोटी ७८ लाख रुपये निधी मिळवला आणि तो पूर्ण निधी वापरण्यात आला. त्यातील 25 टक्के रोपटे जिवंत कशी राहू शकली नाहीत याची चौकशी करण्यात यावी. अशी मागणी दत्तात्रय भरणे यांनी केली. तीच उचलून धरताना याची विधिमंडळाकडून चौकशी व्हावी अशी मागणी नाना पटोले यांनी केली.

दरम्यान यावरून देवेंद्र फडणवीस यांनी देखील पलटवार केला आणि दोन्ही नेत्यांमध्ये वाकयुद्ध रंगले. त्यात सुधीर मुनगंटीवार यांनी उडी घेत वृक्ष लागवड हे एक ईश्वरीय कार्य असल्याचे सांगितले. सोबतच वडेट्टीवारांनी सुद्धा याबाबत चौकशी करायला सांगितली. याबद्दल समिती किती दिवसांत स्थापित होणार आणि किती दिवसांत अहवाल येणार अशी विचारणा मुनगंटीवार यांनी केली. त्यानंतर मात्र उपमुख्यमंत्री अजित पवार यांनी 33 कोटी वृक्ष लागवडीच्या मोहिमेची विधिमंडळाच्या संयुक्त समितीमार्फत चौकशी होणार अशी घोषणाच केली.

News English Summary: Even on the third day of the budget session, the legislature witnessed a match between Mahavikas Aghadi and Bharatiya Janata Party. The third day started with a scuffle between Congress state president Nana Patole and opposition leader Devendra Fadnavis. Nana Patole questioned the tree planting campaign of the then Chief Minister Devendra Fadnavis when the BJP was in power. He also demanded an inquiry. While the debate was going on, Deputy Chief Minister Ajit Pawar slammed Fadnavis saying that he would be questioned.

News English Title: Plantation program probe Ajit Pawar announces probe in 33 crore plantation in Devendra Dadnavis regime news updates.