भाजपा कट्टरतेवर उतरल्यास लोकसभेपूर्वीच देशात दंगली होतील: अमेरिकन गुप्तचर यंत्रणा

नवी दिल्ली: देशात सध्या आगामी लोकसभा निवडणुकीच्या रणधुमाळीला सर्वच पक्षांच्या बाजूने जोरदार सुरुवात झाली आहे. दरम्यान, लोकसभा निवडणुकीला काही दिवस उरले असताना अमेरिकेच्या गुप्तचर विभागाने एक धक्कादायक अहवाल दिला आहे. त्यानुसार भारतीय जनता पक्ष आगामी लोकसभा निवडणुकीपूर्वी कट्टरतेवर उतरल्यास भारतात दंगली उसळण्याची शक्यता या वर्तविण्यात आली आहे आणि हा दावा दुसऱ्या तिसऱ्या कोणी नाही तर जगातील सर्वात मोठी अमेरिकन गुप्तचर यंत्रणा सीआयएनं केला आहे.

अमेरिकी सिनेटला सोपवण्यात आलेल्या अहवालात ही धक्कादायक माहिती देण्यात आली आहे. भारतीय जनता पक्षाने लोकसभा निवडणुकीपूर्वी हिंदू राष्ट्राच्या मुद्द्यावर प्रचंड जोर दिल्यास देशात भयानक सांप्रदायिक दंगली उसळतील, असा खबळजनक दावा या अहवालात करण्यात आला आहे. स्थानिक वृत्तानुसार, अमेरिकी सिनेटच्या निवड समितीसमोर सदर अहवाल ठेवण्यात आला आहे. जो CIA या गुप्तचर विभागाचे संचालक डेन कोट्स यांनी सविस्तरपणे तयार केला आहे.

रिपोर्टमध्ये नमूद केल्या प्रमाणे, जर पंतप्रधान नरेंद्र मोदींच्या नेतृत्वातील भारतीय जनता पक्ष हिंदू राष्ट्राच्या मुद्द्यावर आक्रमक होऊन पुढे गेल्यास देशात लवकरच होऊ घातलेल्या लोकसभा निवडणुकीआधीच मोठ्या जातीय दंगली होतील. अमेरिका दर वर्षाच्या सुरुवातीलाच हा अहवाल प्रसिद्ध करते. त्यानंतर देशभरातील घटनांचं आणि घटनाक्रमांचे मूल्यांकन केलेलं असतं.