भाजपमध्ये प्रवेश करणारे काँग्रेस आमदार अल्पेश ठाकोर पोटनिवडणुकीत पराभूत

गांधीनगर: केवळ महाराष्ट्र आणि हरियाणाच्या विधानसभा निवडणुकीतच नव्हे, तर गुजरातमध्येही भाजपाचा फटका बसल्याचं पाहायला मिळत आहे. गुजरातमधील ६ विधानसभा जागांवर झालेल्या पोटनिवडणुकीत भाजपाला मोठा धक्का बसला आहे. भाजपने बायड व थाराद या विधानसभा जागा गमावल्या असून कॉंग्रेसचा विजय झाला.

गुजरात कॉंग्रेसचा राजीनामा देऊन भाजपमध्ये दाखल झालेले अल्पेश ठाकोर हे भाजपमध्ये येऊन मंत्री होण्याचे स्वप्न पाहत होते, पण गुजरातमधील जनतेने त्यांची स्वप्ने चिरडली. २०१७च्या निवडणुकीत राधानपूर विधानसभा जागा अल्पेश ठाकोर यांनी १४ हजाराहून अधिक मतांनी जिंकली होती. आज त्याच मतदारसंघात अल्पेश ठाकोर ३७१४ मतांच्या फरकाने पराभूत झाले.

विशेष म्हणजे स्वतः या सर्व जागांवरील पोटनिवडणूक मुख्यमंत्री विजय रुपाणी यांनी प्रतिष्ठेची केली होती, कारण ६ पैकी ४ जागा सत्ताधारी भाजपकडे होत्या. राधानपूरचे आमदार अल्पेश ठाकोर आणि बायडचे आमदार धवलसिंग जाला यांनी कॉंग्रेस सोडून भाजपमध्ये प्रवेश केला होता.

तत्पूर्वी गुजरातच्या मंत्रिमंडळात आपल्याला स्थान मिळेल असा दावा अल्पेश ठाकोर निवडणूक प्रचारादरम्यान करत होते. मात्र पराभव झाल्यानंतर त्यांना स्वतःची काँग्रेसमधील ताकद आठवू लागल्याचं म्हटलं जातं आहे.